فيديو| أحمد حلمي يكشف عن أسرار جديدة في حياته

تصدر اسم الفنان أحمد حلمي، تريند جوجل، اليوم الأربعاء 4 أكتوبر 2023، بعد حديثه عن عدة أمور بشأن حياته الشخصية، مثل علاقته بوالده وطفولته، واستمرار الزواج من منى زكي.

وقال حلمي، في لقاء إعلامي: “لم تكن مرحلة طفولتي كما أحب”، وأشار إلى أنه أدرك بعد مرور الوقت، أن طفولته لم تكن كما تمنى، ولكنه كان مستمتعًا بها.

مواقف سعيدة في طفولة أحمد حلمي

أضاف حلمي: “لم أقصد أنها كانت طفولة مشردة، أو معذبة، لكن كان نفسي أكون بعرف لغات وأسافر كتير، وفي حاجات كان نفسي تكون أفضل لكن أنا بحب طفولتي جدًا”.

وعن المواقف السعيدة في طفولته، قال حلمي: “في مرة أنا وأخويا كان عندنا مسحوق غسيل وجزء منه متحجّر وأخويا كان أكبر مني بسنتين، ومرة رمى جزء من مسحوق الغسيل فدخلت في فمي وبلعتها وصوتي راح”.

وتابع حلمي عن الفترة التي قضاها في السعودية: “عشتُ طفولتي في السعودية واللحظة اللي بنرجع فيها للقاهرة كانت بتبقى لحظات سعيدة أوي، وعمري ما أنساها ومشهد سفرنا من القاهرة لبنها كان لا ينسى”.

وعن أصعب أوقات طفولته، قال حلمي: “في جزء كبير من طفولتي نسيته، لكن فاكر بدايةً من الإعدادي، وافتكر لما والدي ضربني بالقلم دي كانت لحظة مؤثرة، وكمان خالي كان بيربي حمام وأنواع غالية، وأنا دخلت وفتحت البلكونة وطيّرت الحمام، وراح خالي اشتكى لوالدي، ووالدي كان ممكن يجي على نفسه عشان الناس، وكذبت على والدي وقلت إن أخويا هو اللي طيّر الحمام وطبعًا اتعرف إني كداب وضربني واتصدمت لأنه ضربني وكانت المفارقة إن الحمام طلع بيرجع تاني للبيت، وبسبب ده عرفت إن في مواقف الطفل مش بينساها، وإنها بتعلّم في نفسيته، وإنك ممكن تجرح ابنك بدون وعي”.

وتابع: “أعتقد إن أي حاجة أثرت فيك مش هتنساها، وإلا هيتحول لمشكلة نفسية ولو العقل حجب الموقف معناه إن المشكلة كبيرة وصادمة جدًا”.

علاقة أحمد حلمي بوالديه

أما عن علاقته بوالديه، قال أحمد حلمي: “دي من الحاجات اللي نفسي أرجع طفل عشان أعيشها مرة تانية، لأن أبويا مات وملحقتش أشبع منه وأعيش معاه مرحلة الصداقة كنت لسة متخرج من الجامعة، وكنت عايش في القاهرة وأهلي في بنها وخلال طفولتي كنا في السعودية ومكنتش مدرك إني لازم أشبع من أهلي وأنا ملحقتش أشبع منه، وهو كان مريض ودي من اللحظات الصعبة إني أحس إني عاجز ومش قادر أعمل حاجة لحد بحبه”.

اقرأ أيضًا| مسلسل عثمان الموسم الخامس.. موعد العرض والقنوات الناقلة بالعربية

وتتطرق في حديثه عن فترة مرض والده، وقال أحمد حلمي إنها الأصعب في حياته وإنه شعر يومها بالعجز الكبير، قائلًا إنه يفتقد والده كثيرًا، فهو لم يعِش الكثير من الوقت معه، بسبب وفاته مبكرًا بعد معاناته مع السرطان.

وأضاف: “أنا بحلم بيه كتير وببقى عارف إن معظمها رسائل ومش من عقلي الباطن لأن قبلها مكنتش بفكر فيه، لكن بحلم بيه فجأة وفي أحلام كان بيزعقلي فيها، ولما سألت حد بيفهم في الأحلام كان بيطلع التفسير عكس ما كنت أنا متخيل، وببقى سعيد لما بشوفه في الحلم”.

أحمد حلمي ومنى زكي

وعن سر استمرار زواجه بمنى زكي قال: “متزوج من منى زكي من عام 2002 والجواز حياة أخرى وأهم شيء في الزواج هو الوصول للغة الثالثة، لأن الرجل عنده لغة بيتكلمها والست عندها لغة بتتكلمها، وزي ما يكون هو بيتكلم إنجليزي وهي فرنساوي، وفي لغة تالتة مشتركة، وهي إن الاتنين يتعلموا لغات بعض، ومهم جدًا إن الراجل يقرأ كتالوج الست والست تقرأ كتالوج الراجل”.