«مستقبلي بيضيع».. يوسف حسن يهاجم إدارة الزمالك

هاجم يوسف حسن، لاعب الفريق الأول لكرة القدم بنادي الزمالك، مجلس إدارة القلعة البيضاء، بعد تجاهله خلال الفترة الماضية على حد وصف اللاعب.

وكتب يوسف حسن عبر حسابه الشخصي على موقع التواصل الاجتماعي “فيسبوك” منشورًا جاء نصه كالتالي “أنا هتكلم بس مش عايز جمهور الزمالك يزعل مني في أي حاجة، أنا بسبب اللي بيحصل معايا ده هبطل كرة بالشكل ده أنا لا بتأهل ولا بتدرب ومستقبلي بيضيع، أنا الكرة هي شغلي وأكل عيشي ومش عارف أنا أذنبت في أي ولا عملت أي عشان اللي بيحصل معايا ده”.

يوسف حسن يهاجم إدارة الزمالك

وأضاف: “عمر ما حد شاف مني حاجة وحشة ولا شاف إني بعمل مشاكل أنا ديمًا فحالي بس اللي حصل فيا مش قليل عارف الناس ممكن متصدقش الي بيحصل معايا بس وحياة الأيام المفترجة دي أكيد أنتو عارفين على موضوع العملية و كده ومحدش كان راضي يعملها من الإدارة وعملتها بعد مجهود كبير جدًا جدًا بعد 6 شهور قاعد في البيت”.

وتابع “بتحصل معايا نفس الحاجة بعد ما الإدارة الجديدة وعدوني هنوديك علاج طبيعي أنت لعيب مهم وأنت وأنت وأنت، أول شهر ودوني لي دكتور علاج طبيعي اسمو د خالد الشناوي، رحت شهر و اتنين والنادي مدفعش الفلوس للدكتور العلاج الطبيعي وكل شوية هو يقولي ويطلب فلوسه، طبعًا أنا اتكسفت أني أروح تاني العلاج الطبيعي أنا بقالي 3 شهور يعتبر قاعد في البيت، وحياة ربنا وحياة ربنا ما حد عبرني بمكالمة تلفون ولا حد بيرد عليا أصلا”.

تفاصيل أزمة يوسف حسن وتأخر علاجه الطبيعي

واصل: “حسبنا الله ونعم الوكيل في كل ظالم أول مرة أشوف كده أول مرة أشوف ظلم بعيني فعلًا عمري محصلي كده في حياتي كل ما أروح لحد يقولي أتكلم مع الادارة أتكلم يقولولي مش عارف أي مفيش حد وقف معايا نهائي بس غلطتي أني مكنتش بطلع اتكلم أنت جيبني بفلوس مش فلوس قليلو مفروض تقدرني مفروض لاعيب منتخب مصر لي بيحصل معايا أنا في نادي كبير واسم كبير”.

واختتم “وجمهور الزمالك عارف أنا بحبهم ازاي بس أنا أتظلمت كتير وغلطتي أني كنت ساكت مش عايز اتكلم بفكر في مصلحتي لما لقيت الناس كلها بتهاجمني أنا ومفكرني أنا الي قاعد في البيت بمزاجي محدش يزعل مني أي حد زعلتو حقه فوق دماغي أنا بحب جمهور الزمالك”.

وتعرض يوسف حسن للإصابة في وقت سابق منذ عدة أشهر، وتم تشخيص الإصابة بقرحة في الكاحل تحتاج للتدخل الجراحي بالليزر. وأشار في وقت سابق على حسابه أنه ينتظر تواصل مسؤولي النادي لإجراء الجراحة حيث طالب بالحصول على مستحقاته المتأخرة من أجل إجراء الجراحة التي تتكلف 150 ألف جنيه.