"سارة الطباخ" تجدد الأزمة مع "الشرنوبي" وترفع ورقة عقد الاحتكار


١٨ سبتمبر ٢٠١٩ - ٠٧:٤٤ ص بتوقيت جرينيتش

رؤية

القاهرة - بعد ساعات قليلة من الإعلان عن توقيع الفنان محمد الشرنوبي عقد بطولة فيلم "شريط 6"، تجددت أزمته مع خطيبته السابقة المنتجة سارة الطباخ التي تملك عقد احتكار لجهوده يمتد لعشر سنوات مقبلة، وأصدرت بيانا عاجلا فجر اليوم حذرت فيه كل شركات الإنتاج من التعامل مع الشرنوبي دون موافقتها.

سارة الطباخ أصدرت ما وصفته بــ"البيان التحذيري" إلى كل شركات الإنتاج الفني والاعلاني والإعلامي من التعامل المباشر مع محمد الشرنوبي إلا من خلال شركتها، مؤكدة أنها الشركة الوحيدة والوكيل الحصري لإدارة أعمال الفنان محمد الشرنوبي، في كافة المجالات الفنية، وفقا للتعاقد المبرم بين شركة إيرث برودكشن والشرنوبي بتاريخ 1 سبتمبر 2017.


وأكد البيان الرسمي أن الشركة علمت بوجود مفاوضات تتم بين بعض جهات الإنتاج الفني والشرنوبي وهو الأمر الذي يعد مخالفة قانونية جسيمة وفقا للتعاقد المبرم عام 2017، وحذرت الجميع من تحمل المسئولية القانونية حال توقيع عقود منفردة، وبنفس الوقت أكدت الشركة أنها ترحب بالتفاوض مع أي جهة ترغب في التعاقد مع الفنان من خلالها.


يذكر أن محمد الشرنوبي اثار ضجة كبرى عقب إصداره بيانا مطولا كشف فيه حقيقة خطوبته السرية للمنتجة سارة الطباخ، وكيف أقنعته بالتوقيع على عقد احتكار لمدة عشر سنوات بشرط جزائي ضخم لا يستطيع سداده، وهو ما يهدد فرصته في استكمال مسيرته الفنية.


الشرنوبي نشر رده المطول عبر حسابه الشخصي بموقع الفيس بوك وقال: "عايز أرد على شوية حاجات وعلى أسئلة كتير بتتسئل بقالها فترة مكنتش حابب أتكلم فيها أنا طول عمري بحب شغلي جداً ومبحبش أتكلم في أي حاجه تانية غيره، بس بقالي فترة عليا هجوم شخصي غير مبرر وكلام كتير له علاقة بحياتي الشخصية ما حبتش أتكلم فيها غير لما أكون جربت كل الطرق في إني أحاول أحلها الأول".

وعلى طريقة سيناريوهات السينما وضع الشرنوبي تاريخ "سبتمبر ٢٠١٧" لبداية القصة وقال: بعد مسلسل لا تطفئ الشمس وحلقات صاحبة السعادة وحفلة الموسيقار الكبير عمر خيرت وأغنية "مين فينا" مع النجمة الكبيرة أصالة وبعد ما كنت لسة ماضي مسلسل كأنه امبارح وفيلم الممر، جالي شغل مع شركة كبيرة عشان أنزلّهم بوست على إنستجرام عندي، اللي كانت ماسكة الحملة دي واحدة اسمها سارة الطباخ.. نشأت علاقة صداقه لطيفة وكانت بتقنعني إني أحترف الغناء.. في فترة كنت عاوز أركز في التمثيل أكتر".

تابع قائلا: "سارة كانت إنسانة جميلة وجدعة جداً.. الموضوع بعد كدة اتطور من صداقة لعلاقة حب وبقى فيه ما بينا ثقة واحترام بس دي كانت بداية مشاكل قوية جداً حصلتلي في حياتي، أهمها عدم رضا أبويا عن العلاقة دي بسبب إن فرق السن بيني وبينها ١٥ سنة، وده كان السبب الرئيسي إن أبويا مكانش موجود في فيديو قراية الفاتحة اللي معظم الناس شافته.

وبالمناسبة الفيديو ده اتصور يوم "٥ أبريل ٢٠١٨" يعني من سنة و٣ شهور تقريباً وفضل أبويا زعلان مني فترة وماتصالحناش غير لما حضرلي أول حفلة أعملها في حياتي وده كان السبب في إن لما قدمته عيطت ونزلت من عالمسرح.

وأضاف: المهم، نرجع للي كنت بقوله.. قبل ما يبقى فيه خطوبة أو حتى اي شغل ما بينا كان عندي أكتر من عرض من شركات إنتاج أغاني كبيرة إني أعمل ألبوم بس كنت حابب أعمل كل فترة أغنية جنب التمثيل.. فضلت سارة تقنعني كتير إننا نشتغل مع بعض ونعمل ألبوم أنا وهي والقرار ده كان مخيف جداً بالنسبة لي لأنه كان معناه اني مش هبقى عارف أتفرغ تماماً للتمثيل، وده للي حصل فعلاً بعد كأنه امبارح".

وتابع سرده للقصة بقوله: اقتنعت وابتدينا نشتغل بعدها فوجئت بيها بتقدم لي عقد احتكار مدته ١٠ سنين والشرط الجزائي اللي في العقد ٦٠٠.٠٠٠ دولار وما ليش حق امضاء اي عمل سواء تمثيل او غناء .. وللأسف دي غلطتي .. انا كنت متخيل ان شروط العقد ده؛ الشروط المتعارف عليها، و لما خفت وقلقت من الشروط دي شوية كانت سارة بتقنعني ان دي مجرد شكليات وان كل حاجه هاتتم بالتراضي وقالتلي بالحرف "اي وقت هاتيجي تقولي فيه ان العقد ده مش مريحك هديلك العقد.. عمري ما هغصبك على حاجه" وبسبب ثقتي فيها وحبي ليها وافقت على كل ده ووافقت كمان اني امضي العقد ده رغم انه كان معمول بتاريخ قبله بحوالي ١٠ شهور (بتاريخ اليوم اللي قابلتها فيه تقريباً).. ومن بعد ما مضيت العقد وبعد ما قريت الفاتحة اللي وقفت قدام كل الناس فيها.. لقيت طريقة تعامل مختلفة تماماً وتوتر بدون أسباب بيحصل بيني وبينها.



وأضاف: فسخت الخطوبة شهر يوليو ٢٠١٨ يعني بعد ٣ شهور بالظبط من قراية الفاتحة وماكناش لسة ساعتها اشتغلنا على الالبوم .. وقلتلها اني مش حابب اكمل شغل خلينا اصحاب احسن .. وكان فيه محاولات معايا من ناس كتير مشتركة ما بيننا عشان يصلحوا الموضوع لاكتر من شهر .. ووافقت اننا ندي نفسنا فرصه تانية كتجربة عشان كان عندي مشاكل كتير في طريقة التعامل .. ورجعنا وكانت الحياه كويسة في الاول ورجعنا نشتغل تاني وبعد فتره بدأت المشاكل ترجع تاني وبشكل اسخف واتسببت في مشاكل كبيرة بيني وبين اهلي واصحابي القريبين وحتى اي حد في الوسط بقى بيتجنبني او بيتجنب التعامل معايا لمجرد ان هي اللي ماسكه شغلي عشان طريقتها مكانتش الذ حاجه خالص .. وبدأت تحاول تتحكم في كل حياتي وعلاقتي بكل اللي حواليا .. ولما حاولت امشي تاني .. ابتدا يبقى فيه استخدام لفكرة العقد بشكل واضح والمشاكل بقت شخصية ومهنية.

وواصل قائلا: ولما مارضتش اكمل في علاقة انا حاسس انها مابقتش مناسبة ليا ولا انا ولا الطرف التاني، ابتدا يبقى اساليب تانية للضغط .. اخرها كان فيديو الخطوبة اللي نزل واحنا اصلاً مش مع بعض .. ولاني عمري ماكنت حابب ان حياتي الشخصية تبقى مجال للكلام ولان فعلاً الخطوبة دي حصلت في يوم من الايام ولأني عمري ماهجرحها او احرجها، ماعلقتش خالص على وعد منها اننا ننزل بعد فترة ان الخطوبة اتفسخت لان احنا فعلاً دلوقتي مش مخطوبين.

وتابع مؤكدا أن عدم رده على الڤيديو في هذه الفتره كشف له عن العديد من الأزمات بين سارة الطباخ وبين عدد كبير من الناس، وأضاف: بقى عندي معلومات وحاجات ماكنتش حابب اني اعرفها عنها.. مع ذلك برضه كنت دايماً بسعى اننا نخرج بالمعروف ومن ساعتها بقى فيه شكل اشرس في التعامل .. ولإن هي بس اللي ليها الحق في الامضاء على العقود .. وهي مابتردش على اي حد بيطلبني في شغل.. فا بقى شغلي واقف وحتى فلوسي القديمة مش عارف اخدها منها وفيه حملات غير مبررة وغير منطقية معمولة عليا وفيها تجريح شخصي ليا ولعيلتي .. ومحاولات لعمل مشاكل بيني وبين الصحفيين اللي عمري ما كان بيني وبينهم مشاكل وبكن لهم كل احترام.. مع العلم ان من اقوى نقاط القوه عندها الميديا والصحافة والعلاقات العامه بحكم شغلها ومع العلم برضه ان شركتها لسه المفروض بتمثلني وبتدير اعمالي.

اختتم حديث قائلا: أنا كنت ملتزم الصمت ومش بتكلم في التفاصيل دي كلها عشان كان بيني وبينها عشره وعيش وملح.. بس واضح اني كنت غلطان عشان نيتي كانت سليمه شوية زياده والطرف التاني ماحطش اي اعتبار لكل الحاجات دى.

وأضاف: دي المرة الوحيدة اللي هاتكلم فيها عن الموضوع ده ومش ناوي أتكلم فيه تاني ولا على مستوى الصحافة ولا على مستوى السوشيال ميديا. والمرة الأولى وبإذن الله الأخيرة اللي أضطر أتكلم فيها عن حاجة ليها علاقة بحياتي الشخصية، بس كان لازم أشرحلكوا إيه اللي بيحصل عشان كل التساؤلات اللي بتحصل بقالها فترة.


الكلمات الدلالية سارة الطباخ محمد الشرنوبي

اضف تعليق