انتحار موظف بسبب ضغط العمل.. ومواقع التواصل في مصر تنتفض

كتبت – سهام عيد

اشتعلت مواقع التواصل الاجتماعي في مصر غضبًا، اليوم (الأحد) فور تداول خبر انتحار موظف في إحدى الشركات الدولية داخل مقر الشركة بسبب ضغط العمل وسوء معاملة رؤسائه، مع دعوات بفتح تحقيق عاجل، ومعاقبة المتسببين في ذلك.

في التفاصيل، قالت روشان بغدادي -وهي زميلة نور الدين الذي يعمل كول سنتر في إحدى شركات الاتصالات الدولية- في فيديو على الفيسبوك: “إنها كانت بجانب نور عاشور حينما التقط آخر أنفاسه وقفز من الطابق الثالث بداخل الشركة”.

وروت بغدادي نظام العمل داخل الشركة والتي دفعت زميلها للانتحار من الطابق الثالث بالشركة، حيث قالت: “الشركة تعمل بنظام الكروت لو غلطت كارت أصفر، بعدها أحمر، وأسود، بعدها تترفد من الشغل، واصفة طريقة تعامل مسؤولي الشركة مع الموظفين بـ”خرفان”.

ووصفت روشان الشركة بـ”المقبرة”، مضيفة: “الناس كلها بتشتكي من التعسف والمديرين”، كل ما يهم المدير هو تحقيق الأرقام: “أحقق أرقامي إزاي؟.. اني اعصر الموظف ينزل أرقام”.

وأضافت باكية : أنا كنت واقفة جنبه وهو بياخد آخر نفسه في المكان، أنا لحد دلوقتي مش عارفة أقوم من السرير ولا أدخل المكان تاني، متابعة: يا جماعة أنت كتيم ليدر أو مدير حط نفسك مكان أي حد، أنت مسؤول، لازم تحسوا بالناس اللي تحت إيديكم.

وواصلت بغدادي: أنت الموظف بيقضي معاك وقت أكتر ما بيقضي في بيته، بتعاملوا الناس على إنه عبيد، إحنا مش عبيد، زي ما أنت عاوزه يتعامل مع الزبائن وبتعاطف معاهم، أنت كمان لازم تشوف مشاكله فين وتتعاطف معاه.

وأكدت قائلة: الراجل كان واقف جنبي وهو بيموت، بتاع الأمن بقوله ربنا يرحمه قالي الله وأعلم، أنت مين عشان تقول مين ربنا يرحمه ومين ربنا ميرحموش.

وشددت: عواطف الناس مش لعبة في إيديكم، الولد نزل الشغل مرجعش لأهله، كل ده عشان تحقق أرقامك، وتكون أحسن مدير.

وأشارت إلى أن المدير لا بد أن يقف بجانب موظفيه، ويضيف إليهم دائمًا، متابعة: ربنا هيسألكم عن الأرواح اللي بتروح بيتها كل يوم مكتئبة، عشان فاكرين إنك مدير ناجح، عمرك ما هتكون مدير ناجح والناس بتروح بتعيط من تعسفك وجهلك ومرضك.

وأكدت أن الشركة لم تنشر نعيا للموظف، وقالت: حسبي الله ونعم الوكيل، لا حول ولا قوة إلا بالله العظيم، وصلنا إننا حتى مش عاوزين ننعي الراجل.

وحملت البغدادي المسؤولية للرؤسائها في العمل، بأنهم السبب في ذلك لتحقيق أرقام قياسيه من أجل الترقية حتى ولو على حساب حياة الموظفين.

من جانب آخر، نشر أحد زملاء الشاب نور الدين علي جروب كول سنتر عبر فيسبوك قائلا: “نور تم استدعاؤه الأسبوع الماضي من طرف مديره، وإبلاغه بخصم أربعة أيام من مرتبه، لأنه بيدخل الحمام كتير، وده لظروف نور الصحية، واتكلم مع نور بطريقة مهينة جدا، وكان في تعمد لإجبار نور على الاستقالة من طرف المدير”.

وأكمل حديثه قائلا: “وللأسف نور كان مضطر يستحمل يقعد الفتره دي، لأنه هيقبض البونص بتاعه في شهر فبراير اللي جاي . لكن محمد باشا صمم يرفد نور قبل ما السنة تقفل، ويحرمه من البونص”.

وأردف متابعاً: “نور كان عامل حسابه علي المبلغ ده في سداد ديون عليه كتير . وده اللي حصل بينهم ، وتم إبلاغ نور بقرار الرفد ( اللي انا متاكد انه هيختفي من الورق دلوقتي علشان سمعة الشركه)”.

واختتم حديثه: “نور ماستحملش ونفسيته كانت منهاره، ومش قادر يواجه مراته واطفاله، واسودت الدنيا في عنيه، وقرر ينتحر بإنه رمي نفسه من الدور التالت في الشركه ومات، دي التفاصيل اللي موظفين الشركه خايفين يتكلموا فيها او ينشروها.. الاستاذ محمد حضرتك كنت السبب المباشر في انتحار نور، أنا لسه معرفش عنك حاجه، بس بوعد حضرتك، إن صورتك هتكون منوره في كل صفحات مصر بعد ساعات”.