نجل عمرو أديب يسخر من «صلعة» والده في حفل زفافه.. والأخير: بداية غير موفقة

حرص نجل الإعلامي عمرو أديب الأكبر خالد، على توجيه رسالة خاصة لوالده خلال حفل زفافه، الذي احتفل به مساء الجمعة 17 نوفمبر 2023، وحضره الأهل والأقارب، بأحد الفنادق.

وقال خالد، لوالده عمرو أديب خلال حفل الزفاف: “الرجل اللي طمني إن أي حاجة هحتاجها طول عمري هتبقى موجودة، وفي نفس الوقت، الرجل اللي رعبني طول عمري إن شعري هيقع، بس في الآخر موقعش، سيداتي آنساتي.. أستاذ عمرو أديب”.

حفل زفاف ابن عمرو أديب

عمرو أديب يرد على نجله في حفل زفافه

من جانبه، خرج عمرو أديب من بين صفوف الحضور، ووجه هو الآخر كلمه لنجله، قائلًا فيها: “طبعًا بداية غير جيدة وغير موفقة، إنه يتكلم عن شعري، هو كدة خسر نص الهدية ونص شهر العسل، ونص كل حاجة.. عايز أقول لكم على حاجة مهمة، لو في ميزة في كل رجالة وأبناء عيلة أديب، إنها ناس طيبة جدًا”.

حفل زفاف ابن عمرو أديب

وأضاف عمرو: “يعني كلنا بشكل أو بآخر ممكن يبقى فينا عيوب الدنيا، لكن هتلقى البذرة اللي جوانا ناس طيبة وأميرة، عشان كدة أنا انهاردة بهدي ابني وهو أحد الطيبين في عيلة أديب، وشخص أمير جدًا لمراته، فرح، وأقول لها حافظي على الطيبة دي، واستغليها لأنها أساس استكمال الحياة، إحنا بقينا في عصر قليل فيه أوي الطيبين، لذلك أنا فخور جدًا إني بنتمي للعيلة دي”.

حفل زفاف ابن عمرو أديب

وحرص أديب، على توجيه الشكر لكل حاضري حفل الزفاف، متابعًا: “كان نفسي أعيط بس مش جاي معايا عياط، إنما هسيب لكم انتم العياط، وبشكر كل حد جالنا في الظروف دي، وبقول له أنا بحبك يا ابني جدًا جدًا جدًا، وبحب فرح جدًا، ونفسي يعملوا كل الحاجات اللي مقدرناش نعملها، طبعًا محدش يقدر يعمل الحاجات اللي عملناها، أنا بشكركم وسعيد بكم، اليوم بشوف أهلي اللي بقالي كتير ماشوفتهمش”.

حفل زفاف ابن عمرو أديب

يذكر أن خالد هو الابن الأكبر لعمرو أديب من زوجته الأولى، ودرس المسرح في الجامعة الأمريكية، وبدأ حياته المهنية كـ “ستاند أب كوميدي”، والآن هو الرئيس التنفيذي لشركة GME التي تنتج برنامج “بالبيجامة”.